Kapag hindi napigil ang paglobo ng populasyon, hindi na makaaahon sa kahirapan ang bansa. Lalo pa ngayong may oil crisis na ang apektado ay ang mga bansang mahihirap na kabilang ang Pilipinas. Paano pa kung hindi na matapos ang krisis sa langis at patuloy pa rin sa pagdami ang mga Pinoys. Saan pupulutin ang bansang ito? Kung patuloy ang kahirapan, tiyak na uusbong ang krimen. Maraming problema at walang ibang papasan kundi ang pamahalaan mismo. Balewala ang pagsisikap ng mga namumuno na mapaunlad ang bansa kung hindi naman nila bibigyang pansin ang paglobo ng populasyon.
Lalo pang malulubog sa kahirapan ang bansa kung patuloy ang pagdami. Nararapat na hindi lamang natural na pamamaraan ang ituro kundi pati na rin ang iba pang makatutulong para hindi lumobo ang mga Pilipino. Wala namang ibang mahihirapan kundi ang gobyerno na rin kung hindi malulunasan ang population explosion. Iprayoridad ang pagkontrol sa pabrika ng mga bata.